Avropa İttifaqının yeni liderləri bəlli oldu

Avropa İttifaqının dövlət və hökumət başçıları növbəti beş il üçün qurumda rəhbər vəzifələrə təyinatları təsdiqləyiblər.

Portuqaliyanın sabiq baş naziri Antonio Kosta Avropa İttifaqı Şurasının prezidenti postunda Şarl Mişeli əvəzləyəcək, Ursula Fon der Leyen daha bir müddətə Avropa Komissiyasının rəhbəri vəzifəsində qalacaq, Avropa diplomatiyasına rəhbərlik edən Cozep Borrel isə öz postunu Estoniyanın Baş naziri Kaja Kallasa təhvil verəcək.

Xarici medianın məlumatına görə, İtaliyanın Baş naziri Corca Meloni təşkilatın kadr məsələlərinin bu cür “paket həlli” ilə razılaşmayıb. O, Antonio Kosta və Kaja Kallasın əleyhinə səs versə də, Ursula Fon der Leyenin namizədliyində bitərəf qalıb.

Macarıstanın Baş naziri Viktor Orban isə səsvermədə Ursula Fon der Leyenin yenidən Avropa Komissiyasının rəhbəri seçilməsinə qarşı çıxıb.

Məlumata görə, Baş nazir Portuqaliyanın sabiq baş naziri Antonio Kostanı dəstəkləsə də, Estoniyanın Baş naziri Kaja Kallasın Avropa İttifaqı diplomatiyasının rəhbəri vəzifəsinə namizədliyinə bitərəf qalıb.

Ursula Fon der Leyenin namizədliyini qəbuledilməz adlandıran Macarıstanın Baş naziri bunu Avropa Parlamentinə son seçkilərdə sağçı partiyaları dəstəkləyən avropalıların aldadılması hesab edib.