Avropada sürücüləri şoka salan artım | Dizel niyə bu qədər bahalaşdı?

“Neftin kağız fyuçerslərinin manipulyasiyası onu yanacaqdoldurma məntəqələrində real yanacağa çevirməyəcək”.

Bu barədə İran parlamentinin spikeri Məhəmməd-Baqer Qalibaf “X” sosial şəbəkəsində bildirib.

“Neft fyuçerslərinə təsir göstərmək üçün işə götürülən firmalar da daxil olmaqla qiymətli kağız bazarında baş verənlərdən xəbərdarıq. İctimai rəyi manipulyasiya etmək üçün daha böyük bir kampaniya da görürük. Ancaq görək bunu yanacaqdoldurma məntəqələrində “həqiqi yanacağa” çevirə biləcəklərmi və ya benzin molekullarını çap edə biləcəklərmi”, – deyə o yazıb.

Qeyd edək ki, Hörmüz boğazında gəmiçilikdə yaranan fasilələr fonunda Avropada neft məhsullarının qiymətləri yüksəlir və tarixi maksimuma yaxınlaşır. Bunu “Platts” agentliyinin məlumatları göstərir.

Hesabata əsasən, az kükürdlü qazoylun fyuçersləri 17 dollar artaraq 1350 dollara çatıb ki, bu da 2022-ci ilin iyun ayından bəri ən yüksək səviyyədir. Eyni zamanda dizelin spot qiymətləri əvvəlki rekordları aşaraq Avropanın şimal-qərbində – 1505 dollara yüksəliub.

“Insights Global”ın məlumatına görə, Amsterdam-Rotterdam-Antverpen mərkəzində dizel və qazoyl ehtiyatları həftəlik olaraq təqribən 5 faizə qədər azalaraq 2 milyon 89 tona düşüb.

Aviayanacaq bazarı gərgin olaraq qalır. Kerosin ehtiyatları illik müqayisədə təqribən 14 faizə azalaraq 737 min tona düşüb ki, bu da ardıcıl dördüncü həftədir azalma deməkdir.

Bundan əlavə, neftin qiymətləri yüksəlir. “Dated Brent”in spot premium qiyməti 2022-ci ilin avqustundan bəri ən yüksək olan barel üçün 4 dollara çatıb.

Analitiklər mövcud tendensiyanı Fars körfəzindəki vəziyyət fonunda təklifin qeyri-sabitliyi ilə əlaqələndirirlər.