Avstraliyada 300 min hektar ərazi yanıb

Avstraliyanın cənub-şərqində davam edən genişmiqyaslı meşə yanğınları yaşayış evlərini məhv edib, 10 minlərlə ailə elektrik təchizatından məhrum olub və geniş meşə əraziləri yanıb.

Viktoriya ştatı hakimiyyəti 300 min hektardan çox meşə ərazisinin ekstremal isti şəraitində yanğına məruz qaldığını bildirib. Ştat ərazisində ən azı 10 böyük yanğının hələ də davam etdiyi qeyd olunub.

Yanğınlar nəticəsində ştat ərazisində yaşayış evləri də daxil olmaqla, 130-dan çox tikili yararsız vəziyyətə düşüb. Təxminən 38 min ev və müəssisə elektriksiz qalıb.

Melburna təxminən 112 km şimalda yerləşən Longvud şəhərinin rayonunda davam edən ən böyük yanğınlardan biri 130 min hektar meşə, 30 bina, eləcə də üzüm bağları və kənd təsərrüfatı torpaqlarını məhv edib.

Yanğın ocaqları yaxınlığında onlarla yaşayış məntəqəsi təxliyə edilib, bir çox milli parklar və kempinqlər bağlanıb.