Avstraliyada yeni qanun qüvvəyə minib

Avstraliya dünyada ilk dəfə 16 yaşdan kiçiklər üçün sosial şəbəkələri qadağan edib.

Dekabrın 10-dan etibarən Avstraliyada yeni qanun qüvvəyə minib.

Qanuna əsasən, dünyanın 10 ən böyük platforması avstraliyalı yeniyetmələrin hesablarını silməli və onların yeni hesab yaratmasının qarşısını almalıdır.

“Bu, böyük bir fərq yaradacaq. Bu, ölkəmizin üzləşdiyi ən böyük sosial və mədəni dəyişikliklərdəndir. Qanun yalnız bu nəslə deyil, gələcək nəsillərə də kömək etmək üçün qarşıdakı aylarda bütün dünyada təsirini davam etdirəcək dərin islahatlardan biridir. Bu, ailələrimizin nəzarəti yenidən ələ alması deməkdir.

Texnologiya həyatımızı asanlaşdırmaqda möhtəşəm rol oynaya bilər, lakin texnologiya inkişaf etdikcə insanların nəzarəti saxlamasını, cəmiyyət olaraq öz səlahiyyətini qorumağı, ailələri dəstəkləməyi və “artıq kifayətdir” deməyi vacib hesab edirik. Biz nəzarəti yenidən ələ alacağıq. Biz bunun yaratdığı təsirə nəzarət edəcəyik!”, – Avstraliyanın Baş naziri Entoni Albanez deyib.

Qadağa “Facebook”, “Instagram”, “Threads”, “X”, “YouTube”, “Snapchat”, “Reddit”, “Kick”, “Twitch” və “TikTok” kimi sosial şəbəkələrə şamil olunur. Tələblərə əməl etməyən platformaları 33 milyon dollara qədər cərimə gözləyir.

Yeni qanun iri texnologiya şirkətləri və söz azadlığını müdafiə edən qurumlar tərəfindən tənqid edilsə də, sorğular avstraliyalıların əksəriyyətinin bu qərarı dəstəklədiyini göstərir.