Ayın sirli dünyasını aydınladan 3 metr uzunluğunda yeni xəritə hazırlandı

Ayın sirləri bir qədər də açılır. Çin alimləri peykin 1-in 5 milyona miqyasında yeni və yüksək dəqiqlikli geoloji xəritəsini hazırlayıblar.

Təxminən üç metr uzunluğu olan bu xəritədə 13 min krater, 81 hövzə, 14 geoloji struktur tipi və 17 növ dağ süxuru əks olunub.

Mütəxəssislər bildirirlər ki, yeni xəritə Ayın geoloji tarixini daha dərindən öyrənməyə imkan verir.

Toplanmış məlumatlar əsasında mineralların siyahısı yenilənib, dağ süxurlarının təsnifatı isə daha da dəqiqləşdirilib. Bu isə gələcək kosmik missiyalar üçün mühüm elmi baza hesab olunur.

Alimlərin sözlərinə görə, xəritə Ayda elmi stansiyanın qurulması və kosmik aparatların eniş nöqtələrinin seçilməsində əsas rol oynayacaq.

Çin artıq növbəti “Çanye-7” missiyasına hazırlaşır və Ayın Cənub qütbündə buz ehtiyatlarını araşdırmağı planlaşdırır. Uzunmüddətli hədəf isə 2030-cu ilə qədər insanın Aya endirilməsi və beynəlxalq tədqiqat stansiyasının yaradılmasıdır.