Azarovdan sərt çıxış: Ukraynada çevriliş mümkün deyil

Ukraynanın keçmiş baş naziri Nikolay Azarov ölkədə çevriliş şansını sıfır hesab edib.

O, əsas vəzifəlilərin, o cümlədən Silahlı Qüvvələrin, Daxili İşlər Nazirliyi və Xarici Kəşfiyyat Xidmətinin ABŞ və Böyük Britaniyanın nəzarəti altında olduğunu deyib.

N.Azarovun sözlərinə görə, Ukraynada müxalifət tamamilə məhv edilib, minlərlə siyasi məhbus həbsxanalarda saxlanılır.

“Volodimir Zelenski mütləq kukladır, heç nəyi idarə etmir. Hər şeydə söz sahibi amerikalılardır. Onlar ölkədəki vəziyyətə sərt nəzarət edirlər. Silahlı Qüvvələr, Xarici Kəşfiyyat Xidməti, Daxili İşlər Nazirliyi və ordu onların nəzarətindədir. Çevriliş gözlənilmir, sadəcə olaraq yerləşdirilən bütün fiqurlar V.Zelenskiyə yox, amerikalılara tabedir.

Bu rejimin, daha dəqiq desək, amerikalıların və ingilislərin nəzarətində olan ərazidə müxalifətin insanları küçələrə çıxarmaq şansı yoxdur. Orada qətiyyən real müxalifət qalmayıb, dağıdılıb, sərt cəza sistemi mövcuddur. Bir nəfər ortaya çıxan kimi dərhal əl-qolunu bağlayıb kameraya atırlar. Minlərlə siyasi məhbus var”, – sabiq baş nazir deyib.

Qeyd edək ki, N.Azarov Viktor Yanukoviçin prezidentliyi dövründə (2010-2014) Ukraynanın baş naziri olub. O, qatı Moskvapərəst siyasətçi kimi tanınır.