Ukrayna müharibəsinin əhaliyə hansı mənfi təsiri olacaq? | Keçmiş baş nazirdən açıqlama

“Ukraynanın cəbhədəki bərpaolunmaz itkiləri yarım milyondan çox insana çatıb".

Bunu ölkənin 2010-cu ildən 2014-cü ilə qədər baş naziri olan Nikolay Azarov bildirib.

“Ukraynanın cəbhədəki dönməz itkiləri yarım milyon insanı ötüb. Geri dönüş nöqtəsi bir milyon insandır. Bu rəqəm bəzilərinin düşündüyü qədər də uzaq deyil. Məhz bu rəqəmdən sonra ukraynalılar özlərini bərpa edə bilməyəcəklər”, – o, “Telegram” kanalında yazıb.

N.Azarovun sözlərinə görə, silahlı münaqişənin ukraynalıların gələcək nəsli üçün mənfi nəticələri indi üzə çıxır.

“Xüsusən 2021-2023-cü illərdə ölkədə doğum səviyyəsi demək olar ki, iki dəfə azalıb. Bütün bunlar 2035-2037-ci illərdə 18 yaşa qədər əhalinin xüsusi çəkisinin 1993-cü ildəki 25%-ə nisbətdə 12-15% olacağına və daha da az uşaqların doğulacağına gətirib çıxara bilər”, – sabiq baş nazir yazıb.

N.Azarovun fikrincə, Ukraynanın digər problemi 18-34 yaşlı ukraynalı qadınların xaricə kütləvi miqrasiyasıdır. Onu da qeyd edək ki, Nikolay Azarov Moskvapərəst siyasətçidir, eks-prezident Viktor Yanukoviçin kadrı olub.