Berlin küçələrində saxta tıxac görün necə yaradıldı | Şirkətdən reaksiya gecikmədi

Almaniyalı konseptual rəssam Saymon Vekert qeyri-adi eksperimentlə “Google Maps” sisteminin necə işlədiyini test edib.

Belə ki, o, 99 ədəd mobil telefonu supermarket arabasına yerləşdirərək Berlin küçələrində yavaş-yavaş hərəkət edib. Telefonlarda isə “Google Maps” tətbiqi aktiv olduğuna görə sistem bu vəziyyəti tıxac kimi qeydə alıb.

Rəssamın sözlərinə görə, hər bir telefonda sim-kart olub və aktiv naviqasiya işləyib.

O müəyyən edib ki, əgər arabada olan cihazlar hərəkətdə deyilsə, o zaman tıxac görünmür. Çünki tıxacın görünməsi üçün daimi hərəkət vacibdir. Eksperimentdən sonra “Google” bu yaradıcılığa müsbət reaksiya verib. “İstər avtomobil, istər araba, istərsə də heyvan ‒ biz “Google Maps”in yaradıcı şəkildə istifadəsini alqışlayırıq. Bu, xidmətimizi daha da təkmilləşdirməyə imkan yaradır”, ‒ deyə şirkətin yaydığı məlumatda deyilir.

“Google”dan o da qeyd olunub ki, bəzi ölkələrdə 4 və 2 təkərli nəqliyyat vasitələri alqoritm tərəfindən ayırd edilə bilinir, amma arabalar hələ tanına bilmir.