Bərpa üçün 262 layihəyə 3,14 milyard dollardan çox vəsait yatırılıb

Cənubi Çin dənizində tədqiq olunan 9 ada və rifin ekoloji vəziyyəti əsasən yaxşı qiymətləndirilsə də, ayrı-ayrı ərazilərdə ciddi problemlər qalmaqdadır.

Çinin Təbii Sərvətlər Nazirliyinin hesabatına görə, bu, ölkənin regiondakı ada və riflərin ekoloji vəziyyətinə dair ilk kompleks qiymətləndirməsidir.

Hesabata əsasən, Sişa adalarında ekosistemin bərpası ilə bağlı müsbət dinamika müşahidə olunur. Xuanqyan adasında isə 135 mərcan növü qeydə alınıb və qorunan ərazidə canlı mərcan örtüyü 38,8 faizə çatır.

Nansha adalarının ümumi vəziyyəti də yaxşı qiymətləndirilsə də, bəzi riflərdə ekoloji deqradasiya sürətlənib. Belə ki, Tiexian rifində canlı mərcan örtüyü 2016-cı illə müqayisədə təxminən 70 faiz azalıb. Buna taclı dəniz ulduzlarının kütləvi yayılması, tropik siklonlar və insan fəaliyyəti səbəb kimi göstərilir.

Ren'ai rifində isə xarici hərbi gəminin yaratdığı çirklənmə, tullantılar və balıq torları mərcanların bərpasına ciddi mane olur.

Çin regionda ekosistemlərin bərpası üçün də layihələr həyata keçirir. 2021-2025-ci illərdə 262 layihəyə 3,14 milyard dollardan çox vəsait yatırılıb. 2025-ci ilin sonuna qədər isə Cənubi Çin dənizində 2,66 milyon hektar ərazi ekoloji mühafizə zonasına, 7 milyon hektar ərazi isə dəniz təbiət qoruqlarına daxil edilib.