Böyük Britaniya hava limanlarında texniki nasazlıq 65 min sərnişinə təsir edib

Böyük Britaniyanın bir sıra iri hava limanlarının işi hərəkətin idarə edilməsi sistemindəki texniki nasazlıq səbəbindən pozulub.

Bu barədə "NBC News" məlumat yayıb.

Problem Londonun Hitrou və Qatvik hava limanlarından, həmçinin Mançester, Edinburq və digər hava limanlarından həyata keçirilən uçuşlara təsir edib.

Sərnişinlərə reyslərinin statusunu aviaşirkətlərdən dəqiqləşdirmək tövsiyə olunub. Hitrou hava limanının rəhbərliyi problemin aradan qaldırılması üçün Britaniyanın Milli Hava Hərəkətinin İdarəedilməsi Xidməti ilə birgə işlədiklərini bildirib.

Daha sonra mühəndislərin sistemdə düzəlişlər etdiyi, bundan sonra reyslərin emalı sisteminin bərpa olunmağa başladığı açıqlanıb. Eyni zamanda, xidmət fəaliyyətin tam bərpasının bir qədər vaxt aparacağı barədə xəbərdarlıq edib.

"Ryanair" aviaşirkəti nasazlıq səbəbindən təxminən 65 min sərnişinin zərər çəkdiyini və planlaşdırılmış 50 reysin ləğv edildiyini bildirib.