Böyük Britaniyada radioaktiv sular dənizə sızıb

Böyük Britaniyada nüvə silahlarının saxlanıldığı hərbi bazadan köhnə boruların dəfələrlə partlaması nəticəsində radioaktiv su dənizə sızıb.

Bununla bağlı “The Guardian” mənbələrə istinadən məlumat yayıb.

“Müəyyən edilib ki, radioaktiv materiallar Şotlandiyanın qərbindəki Qlazqo yaxınlığındakı “Loch Long” ərazisinə sızıb. Çünki Kral Hərbi Dəniz Qüvvələri bazada 1500 su borusu şəbəkəsini lazımi səviyyədə saxlaya bilməyib”, − deyə məlumatda qeyd olunub.

Söhbət Şotlandiyanın Kulport qəsəbəsi yaxınlığında yerləşən hərbi bazadan gedir. Dörd “Trident” sualtı qayığı üçün nəzərdə tutulmuş nüvə başlıqları burada saxlanılır.

“The Guardian” Şotlandiyanın Ətraf Mühitin Mühafizəsi Agentliyinin sənədlərinə istinadən hərbi bazanın borularının dəfələrlə partladığını yazıb. Nəticədə, borulardan döyüş başlıqlarında istifadə olunan radioaktiv tritiumla çirklənmiş suyun sızdığı bildirilir.

Xəbərdə o da qeyd olunur ki, rəsmilər uzun illər sızmalarla bağlı məlumatı gizlətməyə çalışıblar və bunun milli təhlükəsizlik məsələsi olduğunu iddia ediblər.