Braziliya Ali Məhkəməsi sabiq prezident barədə qərar verdi

Braziliyanın Ali Məhkəməsi keçmiş prezident Jair Bolsonarunu ev dustaqlığına buraxıb.

“Reuters” xəbər verir ki, məhkəmə həmçinin onun mobil telefondan istifadəsinə qadağa qoyub və ünsiyyət qura biləcəyi insanları məhdudlaşdırıb.

Hakim hökmünü Bolsonarunun avqustun 3-də videolink vasitəsilə tərəfdarlarına müraciət etməsi və daha sonra onun nitqinin hissələrinin sosial mediada yayılması ilə əsaslandırıb. Hakim bunu istintaq orqanlarına və məhkəmə sisteminə təzyiq cəhdi kimi qiymətləndirib.

70 yaşlı keçmiş prezident 2022-ci il seçkilərində qalib gələn Luiz İnasio Lula da Silva hökumətini devirmək planında ittiham olunur.

İttihama görə, 2023-cü il yanvarın 8-də Bolsonaru tərəfdarları Lulanın andiçməsindən qısa müddət sonra Konqresə, Ali Məhkəməyə və Braziliyadakı prezident sarayına hücum ediblər.

İyulun 19-da məhkəmə artıq siyasətçiyə bir sıra qadağalar qoyub – ondan elektron qolbaq taxmaq və sosial şəbəkələrdən istifadə etməmək tələb olunur. Hazırkı məhkəmə prosesinin başa çatmaq üzrə olduğu bildirilir. Bolsonaru ölkədə “demokratik hüquqi nizamı məhv etmək”də ittiham olunur. Lakin o, bütün ittihamları qətiyyətlə rədd edir.