Bu hörümçək başqalarından belə fərqlənir | Kubada tarantulun yeni növü aşkarlandı

Çexiyanın Masarik Universiteti və Kuba Zooloji Cəmiyyətinin tədqiqatçıları Kubanın qərbində “Trichopelma grande” adlı tarantulun yeni növünü aşkar ediblər.

Unikal tapıntı ölçüsü və ayaqlarındakı bol uzun tükləri ilə fərqlənir. Bu onları daha heybətli və qorxunc göstərir.

Bundan başqa, hörümçəyin qarnındakı qeyri-adi ləkə elm adamlarının diqqətini cəlb edib. Belə ki, onun bədəninin yuxarı hissəsinin kənarları sıx şabalıdı və qəhvəyi rəngdə tüklərlə örtülü olduğu halda, mərkəz hissəsi hamar və qaranlıq formadadır.

Araşdırma zamanı alimlər DNT ardıcıllığından istifadə ediblər. 1 348 ultrakonserved element lokusu təhlil edilib və nəticədə yüksəkkeyfiyyətli məlumatlar əldə olunub.

Tədqiqatçılar genetik məlumatlarla yanaşı, yeni növün morfoloji quruluşunu da öyrəniblər. Bu da onlara tarantulun unikal xüsusiyyətlərini daha yaxşı anlamağa imkan verib.

Yeni növ Kubanın qərbindəki Vinyales Milli Parkında aşkar edilib. Ekoloqlar onun ətraf mühitin mənfi təsirinə məruz qalmasından və məhv olmasından ehtiyat edirlər.