Bu "iPhone"un enerjisi tez bitməyəcək: "iPhone" 15 satışa nə vaxt çıxır?

“Apple” şirkəti yeni məhsullarını təqdim edib.

Ən çox gözlənilən isə “iPhone 15” smartfonu olub. Tədbir korporasiyanın “YouTube” səhifəsində canlı yayımlanıb.

Bu dəfə smartfon iki yeni modellə təmsil olunur: ekran ölçüləri müvafiq olaraq 6,1 və 6,7 düym olan “iPhone 15” və “iPhone 15 Plus”. Smartfonlar 48 meqapiksellik əsas kamera və bundan əvvəlki modeldən 20 % az enerji sərf edən “A16 Bionic” prosessoru ilə təchiz edilib.

Şirkət iddia edir ki, 5 rəngdə istehsal olunan smartfonlara enerjinin bir dəfə doldurulması bütün gün kifayət edəcək. Bundan əlavə, smartfonun səthinə mexaniki gərginlikdən qorumaq üçün xüsusi keramik örtük çəkilib. Bu seriyaya gələn əsas yenilik USB “Type-C” girişi, 2000 nit parlaqlığında ekrandır.

“iPhone 15 Pro” və “iPhone 15 Pro Max”da olan yeniliklərdən əsası gövdənin titandan hazırlanmasıdır. Yəni kənar çərçivələr artıq paslanmaz poladdan yox, yeni materialdandır. Bu da smartfonun ən yüngün pro model olmasına gətirib çıxarıb.

Əlavə olaraq pro seriyada səs tənzimləyən düymə yox olub və əvəzinə basılabilən, eyni zamanda müxtəlif funksiyaların inteqrasiya edilə biləcəyi düymə quraşdırılıb.

“iPhone 15 Pro” və “iPhone 15 Pro Max” telefoto kamerasında yenilik etdi ki, bu da artıq 3 dəfə yox, 5 dəfə yaxınlaşdırmanı dəstəkləyəcək. Bu modellər yeni “Apple A17 Bionic” çipindən güc alacaq və dünyada mobil prosessorlar arasında 3 nm arxitekturada hazırlanan ən güclü prosessordur.

Qiymətlər Amerika bazarında 799 dollardan 1199 dollar arasında dəyişir. Satışa isə 22 sentyabrdan etibarən çıxacağı bildirilir.