Bu ölkə dağıdıcı cavab alacaq! - Xamenei müharibələrin bitəcəyi vaxtı açıqladı

“Müharibələr ABŞ və Avropa ölkələri bölgəmizi tərk edəndə bitəcək. Ümid edirəm ki, o günlər uzaqda deyil. Regiondakı problemlərin kökündə ABŞ və bəzi Avropa ölkələri dayanır. Region ölkələri isə özlərini idarə edə, sülh və rifah içində birlikdə yaşaya bilərlər”.

Bu sözləri İranın ali dini lideri Ayətullah Əli Xamenei deyib.

O bildirib ki, əgər İsrail hər hansı səhvə yol versə, daha güclü və daha dağıdıcı cavab alacaq. İran öz suverenliyini qorumaq və təhdidlərdən yayınmağa qadirdir. Gücümüz lazımi cavabı verməyə də yetir.

“Həsən Nəsrullahın itkisi kiçik hadisə deyil, bu bizi çox kədərləndirdi. Ömrüm yetdikcə bundan sonra da Qəzza və Livanın problemləri ilə məşğul olacağam. Ümid edirik ki, Allahın lütfü, İran xalqının böyük səyləri və İran İslam İnqilabından ilhamlanan digər xalqların əməkdaşlığı ilə bu bölgədən şər qüvvələrin varlığını azalda və yox edə biləcəyik”, – deyə o qeyd edib.