Bu ölkə də Rusiya ilə sərhədlərini bağlayır

Estoniya Rusiya ilə sərhədin yaxın gələcəkdə bağlana biləcəyi ilə bağlı həmin ölkənin vətəndaşlarına xəbərdarlıq edib.

Bu barədə yerli media məlumat yayıb. Qeyd edilib ki, Narva sərhəd-keçid məntəqəsində rusiyalı miqrantlara hətta bununla bağlı yazılı bildirişlər belə verilib.

Estoniya Polis Departamentinin Sərhəd Mühafizə İdarəsinin rəisi Veiko Kommusaar isə açıqlamasında bildirib ki, sərhəd “miqrant təzyiqi” səbəbindən bağlana bilər.

Onun sözlərinə görə, son həftələrdə Rusiya Avropa İttifaqına qanuni şəkildə daxil olmaq üçün hüququ olmayan bir qrup əcnəbini qəsdən Estoniya sərhədinə göndərib.

Vurğulayıb ki, bu vəziyyət davam edərsə, ölkəsi Finlandiyanın Rusiyaya qarşı atdığı addımı atacaq və sərhəd məhdudiyyətini tətbiq edəcək.

Məlumat üçün bildirək ki, Finlandiya hökuməti də sözügedən qərarı Rusiya ərazisindən ölkəyə daxil olmaq istəyən çox sayda miqrant axınının qarşısını almaq məqsədilə qəbul edib.