Bu ölkədə boşanmaq niyə qadağan edilmişdi? - ORALARDA NECƏDİR?

“Oralarda necədir?” rubrikasının yeni buraxılışında Bakıdan 3160 kilometr məsafədə, Aralıq dənizi sahillərində yerləşən Malta Respublikasından bəhs edilib.

1974-cü ildə respublika elan edilən ölkə Müqəddəs İohann katedralı, qədim Mdina şəhəri və Misir ehramlarından daha qədim olduğu bildirilən Hacar Qim meqalit kompleksi ilə məşhurdur.

Maltada dövlət xəstəxanalarında tibbi xidmətlər pulsuzdur. Ölkə vətəndaşı olan qadınlar üçün ana olmaq da ödənişsizdir.

Uşaqlar üçün dövlət bağçaları olmadığından 3 yaşınadək körpələr əsasən özəl bağçalara gedirlər. Məktəbəhazırlıq isə 3 yaşdan başlayır. Katolik məktəblərinə qəbul zamanı müraciət edənlərin sayı çox olarsa, püşkatma keçirilir.

Maltanın küçələri və evləri Bakının İçərişəhərini xatırladır. Burada tarixi binaların görünüşünü dəyişmək, hətta bəzi evlərin qapılarının rəngini yeniləmək belə qadağandır.

Əhəngdaşından tikilən evlərə xüsusi adlar verilir. Yeni ev tikmək minimum 100 min avroya (190 484 manat), təxminən 900 illik tarixi evlərdən birini almaq isə 1 milyon avroya (1 904 840 manat) başa gələ bilər. Belə evlər çox vaxt təmirsiz satılır, bərpa və kommunal xətlərin çəkilməsi isə əlavə xərc tələb edir.

Maltada boşanma yalnız 2011-ci ildə qanuniləşdirilib. Bundan əvvəl ölkənin qanunvericiliyində boşanma nəzərdə tutulmurdu. Hazırda isə bu proses iki ilədək davam edə bilər. Hətta tərəflər razılaşdıqda belə müəyyən prosedurlara əməl olunmalıdır.