Bu ölkələr Rusiyadan qorxduğu üçün... | “Politico”dan qalmaqallı məlumat

Keçmiş sovet ölkələri Latviya, Litva və Estoniya Ukraynadan sonra Rusiyanın hədəfi olacaqlarından qorxurlar.

Bu barədə “Politico” kəşfiyyat mənbələrinə istinadla yazır.

ABŞ nəşri bildirir ki, Rusiyanın digər regionlarda müharibəyə başlayacağı təhlükəsi Avropanın, xüsusən də Rusiyanın yaxınlığında yerləşən Baltikyanı ölkələr, Şimali Avropa və Polşa kimi dövlətlərin əsas qorxusudur.

Estoniya Xarici Kəşfiyyat Xidməti artıq xəbərdarlıq edib ki, Rusiya NATO ilə gələcəkdə mümkün müharibəyə hazırlıq məqsədilə silahlı qüvvələrini genişləndirir. Danimarka kəşfiyyatı beş il ərzində Rusiyanın Avropada genişmiqyaslı müharibə aparmağa hazır ola biləcəyini proqnozlaşdırır. Litva hökuməti məcburi hərbi xidmətə çağırışı bərpa edib və müdafiə xərclərini ümumi daxili məhsulun 3,45 faizinə qədər artırıb. Latviya kəşfiyyatı isə hesab edir ki, Kreml məqsədyönlü şəkildə NATO ilə qarşıdurma potensialını inkişaf etdirir.

Nəşr qeyd edir ki, Finlandiya və İsveçi də NATO-ya üzv olmağa sövq edən Rusiya qorxusu idi.

“Uzunmüddətli perspektivdə rusların həqiqətən kollektiv müdafiə ilə bağlı NATO-nun 5-ci maddəsini sınaqdan keçirə biləcəklərinə qərar verəcəyi ehtimalını istisna etmirəm”, — İsveç hərbi kəşfiyyatının rəsmisi “Politico”ya deyib.

Kəşfiyyatçı indiki məqamda Rusiyadan hərbi təhlükənin qaçılmaz olduğunu iddia etmir: “Ukraynada müharibə davam edərkən Rusiyanın növbəti genişmiqyaslı hərbi kampaniya aparmağa imkanı yoxdur”. Bununla belə, onun sözlərinə görə, Rusiyanın hələ də hər an istifadə edə biləcəyi bir çox vasitələri var: döyüş təyyarələri və döyüş gəmilərindən tutmuş nüvə silahları və kiber texnologiyalara qədər.