“Bu paylaşımın silinməsi doğru addım oldu” | Ömer Çelik

Yunanıstan Hərbi Hava Qüvvələrinin sosial media hesabında noyabrın 11-də Gürcüstanda qəzaya uğrayan Türkiyə Silahlı Qüvvələrinin hərbi yük təyyarəsi ilə bağlı paylaşım edilib.

Yunanıstan HHQ “C-130” təyyarəsinin olduğu şəkli “Günün fotosu” qeydi ilə paylaşıb.

Paylaşıma Türkiyə istifadəçilərindən kəskin reaksiyalar olub. Türkiyə Xarici İşlər Nazirliyi buna cavab olaraq Yunanıstana nota verib. Notadan sonra Yunanıstan tərəfi paylaşımı silib və ölkənin Baş Qərargahı tərəfindən Ankaraya başsağlığı məktubu göndərilib.

Hakim Ədalət və İnkişaf Partiyasının sözçüsü Ömer Çelik də Yunanıstan HHQ-nin paylaşımına münasibət bildirib:

“Yunanıstan Hərbi Hava Qüvvələrinin şəhidlərimizə qarşı bütün insani və hərbi dəyərlərdən məhrum çirkin paylaşımını pisləyirik. Bu paylaşımın silinməsi və şəhidlərimizlə bağlı başsağlığı mesajının verilməsi doğru bir addım oldu. Zəlzələ və digər fəlakətlər zamanı bir-birimizin yardımına qaçır və ağrıları bölüşürük. Doğru olan budur. O çirkin mesajı paylaşanlar barədə lazımi tədbirlərin görülməsi və müvafiq cəzaların verilməsini gözləyirik”.