İmamoğlu ilə bağlı şikayətlər kim tərəfindən edilib? | Sensasiyalı açıqlama

Türkiyənin İstanbul şəhərinin bələdiyyə sədri Ekrem İmamoğlunun polis tərəfindən saxlanılması ölkə gündəmini zəbt edib.

Ana müxalifət olan Cümhuriyyət Xalq Partiyasının (CHP) prezidentliyə potensial namizədi E.İmamoğluya Prokurorluq tərəfindən ciddi ittihamlar irəli sürülüb.

İstanbul Baş Prokurorluğunun yaydığı məlumatda E.İmamoğlu və bir qrup şəxs cinayətkar təşkilatın rəhbəri olmaq, cinayətkar təşkilata üzv olmaq, qəsb etmə, rüşvətxorluq, dələduzluq, qanunsuz olaraq şəxsi məlumatların əldə edilməsi, tenderin saxtalaşdırılması kimi cinayətlərdə ittiham olunub.

Məsələ ilə əlaqədar hələlik hakim Ədalət və İnkişaf Partiyasından (AK Partiya) rəsmi reaksiya verilməyib.

“Modern.az” saytına açıqlamasında Türkiyə Böyük Millət Məclisinin AKP-dən olan deputatı Yıldırım Tuğrul bildirib ki, E.İmamoğlu barədə şikayətlərin hamısı CHP üzvləri tərəfindən edilib:

"Beşiktaş bələdiyyə sədri Rıza Akpolat həbs olunmuşdu. Onun verdiyi ifadələrə əsasən istintaq başladılıb. Qurultay prosesində pul işləri, həm layihələr, həm rüşvət, şəhərsalma işləri ilə bağlı pul məsələlərini açıqlayıb. Beykoz, Beşiktaş, eləcə də Esenyurt bələdiyyələrindəki şikayətlərin hamısı CHP üzvləri tərəfindən edilib".