Bu qidaları səhərlər qəbul etmək məsləhətli deyil | Rusiyalı həkim həyəcan təbili çaldı

“Səhər yeməyi ən vacib qida qəbulu hesab olunur. Mütəxəssislər səhər yemədən günə başlamağı tövsiyə etmirlər. Səhər yeməyinin orqanizmə fayda verməsi üçün onun tərkibinə də diqqət yetirmək vacibdir”.

Bu barədə rusiyalı qastroenteroloq Valeriya Lomova məlumat verib.

Mütəxəssisin sözlərinə görə, səhər yeməyinin faydalı olması üçün yumurta, sıyıq, avokado, qoz-fındıq, yaşıl çay və itburnu dəmləməsi kimi məhsulları qəbul etmək daha xeyirlidir.

Səhər yeməyində çörək, şirniyyat kimi sadə karbohidratları qəbul etmək məsləhət deyil. Belə qidalar qanda insulin səviyyəsini sürətlə artırır ki, bu da çəki artımına səbəb olur.

Qastroenteroloqun sözlərinə görə, acqarına müxtəlif meyvə şirələri içmək tövsiyə olunmur. Belə olan halda turşular və qaba liflərin olması səbəbindən bu meyvə suları mədənin selikli qişasını qıcıqlandıra və nəticədə qastriti kəskinləşdirə və ya xora yarada bilər.

Səhərlər acqarına qəhvə içmək də məsləhər görülmür. Bu zaman mədənin selikli qişası qıcıqlana və xlorid turşusunun ifrazı artıra bilər.

Həkim onu da vurğulayıb ki, qəhvədən tamamilə imtina etmək də lazım deyil, çünki onun bir çox faydalı xüsusiyyətləri var. Qəhvəni yeməkdən sonra və mümkünsə südlə birlikdə içmək lazımdır.

Mütəxəssis səhər yuxudan oyananda acqarına otaq temperaturunda su içməyi məsləhət görüb.