Bu sənəd ona səbəb olacaq ki... | Putinin Kim Çen Inla görüşünün məqsədi

“Rusiya ilə Koreya Xalq Demokratik Respublikası arasında münasibətlər ən yüksək nöqtədədir”.

Bunu Şimali Koreya lideri Kim Çen In ölkədə səfərdə olan Rusiya Prezidenti Vladimir Putinlə görüşü zamanı bildirib.

O əlavə edib ki, Kreml rəhbərinin Pxenyana səfəri xalqlar arasında qarşılıqlı dostluğun təməlini möhkəmləndirməyə imkan verəcək:

“Dünyada vəziyyət sürətlə dəyişir və mürəkkəbləşir, bu şəraitdə Pxenyan Moskva ilə strateji əlaqəni gücləndirmək niyyətindədir. Biz Rusiyanın bütün siyasətini qeyd-şərtsiz dəstəkləyəcəyik. Bütün sahələrdə əməkdaşlıq və qarşılıqlı mübadilənin genişləndirilməsi ilə bağlı konstruktiv fikir mübadiləsinin mümkün olacağına ümid edirik”.

Görüş zamanı Vladimir Putin öz növbəsində bildirib ki, Moskva ilə Pxenyan arasında uzun illər münasibətlərin əsasını təşkil edəcək yeni fundamental sənəd hazırdır. İki liderin qısa çıxış bəyanatlarından sonra söhbət mətbuata qapalı davam edib. Daha sonra V.Putinlə Kim Çen In arasında təkbətək formatda görüş keçirilib.