Bu şəxs tarixə adını belə həkk etdi | Hər kəs bu adam haqqında danışır

"Qızıl əlli adam" kimi tanınan Ceyms Harrison öz qanı sayəsində 2 milyondan çox körpənin həyatını xilas edən şəxs kimi tarixə düşüb.

Belə ki, onun qanında nadir "Anti-D" antitelləri mövcud olub. Bu maddə hamiləlik zamanı qan qrupu uyğunsuzluğu səbəbindən doğulmamış körpələrin həyatını təhlükəyə atan analara verilən dərmanların hazırlanmasında istifadə olunurdu.

C.Harrison 14 yaşında ağır sinə əməliyyatı zamanı qan köçürüləndən sonra donor olmağa qərar verib. O, 18 yaşından etibarən hər iki həftədən bir plazma verməyə başlayıb və bunu 81 yaşına qədər davam etdirib. 2005-ci ildə o, dünyanın ən çox plazma verən donoru kimi rekord qırıb.

C.Harrisonun qızı Treysi Melloşip atasının heç bir xərc çəkmədən və ağrı hiss etmədən bu qədər insanın həyatını xilas etməsindən böyük qürur duyduğunu bildirib.

"O, həmişə deyirdi ki, bu proses heç ağrılı deyil və sənin xilas etdiyin həyat bir gün sənin öz həyatın da ola bilər", ‒ deyə qızı əlavə edib.

Treysinin sözlərinə görə, atası onun səxavəti sayəsində övladları dünyaya gələn ailələrin hekayələrini eşitməkdən çox məmnun olurdu.

Qeyd edək ki, Ceyms Harrison bu ilin martında 88 yaşında vəfat edib.