Burada milyonlar qazanmaq üçün hamı bir-birini məhkəməyə verir - ORALARDA NECƏDİR?

“Oralarda necədir” rubrikasının yeni buraxılışı yayımlanıb.

Bu dəfə 1664-cü ilədək Nyu-Amsterdam adlanan, Sentral parkı, Azadlıq heykəli, Bruklin körpüsü, Metropoliten muzeyi və işıqlı reklamları ilə məşhur olan ABŞ-nin Nyu-York şəhərindən bəhs edilib.

Bu şəhərdə hər il təqribən 100 min uşaq doğulur. Sığortalanan hər bir qadın üçün dünyaya övlad gətirmək havayıdır. Sığortanın aylıq qiyməti isə 200 dollardır (340 manat). Sığorta olmasa belə, dövlət xəstəxanasında ödəniş etmədən ana olmaq mümkündür.

Maraqlı məqamlardan biri isə odur ki, burada təcili yardım çağıranda arxası ilə yanğınsöndürən maşın da gəlir. Amma hamilə qadını xəstəxanaya çatdırmaq üçün təcili yardım çağırmağı sığorta qarşılamır. Onun qiyməti isə 600 dollardır (1020 manat).

Manhettendə biznes açmaq bahalıdır. Məsələn, burada adi restoran açmaq üçün minimum 500 min dollar lazımdır. Yüksəksəviyyəli restoran isə 2 milyon dollara başa gələ bilər. 2-ci Avenyu adlanan, bahalı mağaza və restoranların yerləşdiyi küçədə icarəhaqqı bir kvadratmetrə görə minimum 9 min dollardır (15300 manat).

Amerikada hər kəs vergi ödəyicisi olduğuna görə demək olar ki, hər kəsin şəxsi mühasibi var. Çünki çox vaxt qazancı hesablamaq və vergini dəqiq ödəmək elə də asan olmur. Kiçik bir qeyri-dəqiqlik məhkəmə ilə nəticələnə bilər. Odur ki, hər bir amerikalının həm də vəkili var.

Maraqlıdır ki, amerikalılar nəsə olan kimi məhkəməyə müraciət edirlər. Vəkillərə pul xərcləsələr də, məhkəmədə udmaq da var və adi məsələlərə görə minlərlə dollar təzminat almaq adama şirin gəlir. Hətta bir dəfə valideyn uşağı bağçaya gipslə gətirdiyi halda axşam bunu tərbiyəçinin üzərinə atıb bağçadan təzminat tələb edərək onları məhkəməyə verir və prosesi udur.