Burada yaşayan canlılara dünyanın başqa heç yerində rast gəlinmir

Kalahari səhrasının altında nəhəng yeraltı göl gizlənir. Onun dərinliyi yüzlərlə metrə çatır və burada Yer üzündə başqa heç yerdə rast gəlinməyən canlılar yaşayır.

Namibiyada yerləşən "Əjdahanın Nəfəsi" mağarası səthdən təxminən 60 metr dərinlikdə başlayır və dünyanın ən böyük yeraltı gölünə çıxır. Gölün səth sahəsi təxminən iki futbol meydançası böyüklüyündədir.

Mağara adını girişdən qalxan isti və rütubətli havadan alıb. Müəyyən şəraitdə bu hava kondensasiya olunaraq incə duman yaradır. Mağara milyonlarla il ərzində yeraltı suların süxurları yavaş-yavaş həll etməsi nəticəsində formalaşıb və böyük su ilə dolu boşluq yaranıb.

Mağara 1986-cı ildə kəşf edilib. Bir il sonra oraya ekspedisiya təşkil edilib və təxminən 2 hektar sahəsi olan yeraltı göl araşdırılıb. 2015-ci ildə dalğıclar 132 metr dərinliyə enə biliblər. 2019-cu ildə isə süni intellektlə təchiz olunan "Sunfish” adlı avtonom sualtı dron vasitəsilə mağaranın xəritəsi hazırlanıb və gölün dərinliyinin 264 metrə çatdığı müəyyən edilib.

Bu mağaradakı xüsusi şərait – günəş işığının olmaması, kristal təmiz su və sabit temperatur burada unikal canlıların formalaşmasına səbəb olub. Onlar arasında kor qızılı mağara balığı və ağ kor krevetlər var. Bu növlər tam qaranlıq mühitə uyğunlaşaraq təkamül edib və əsasən mağaranın yuxarı hissəsində yaşayan yarasaların nəcisləri ilə qidalanırlar.