Cənubi Afrika Prezidentindən Trampın qərarına reaksiya

Cənubi Afrika Prezidenti Siril Ramafosa ABŞ Prezidenti Donald Trampın ölkəsini 2026-cı ilin dekabr ayında Floridada keçirilməsi planlaşdırılan növbəti G20 sammitinə dəvət etməyəcəyindən təəssüfləndiyini bildirib.

Onun açıqlaması Cənubi Afrika Prezident ofisinin “X” sosial media platformasında yerləşdirilib:

“S.Ramafosa Prezident Trampın Cənubi Afrikanın 2026-cı il G20 sammitində iştirakı ilə bağlı təəssüf doğuran açıqlamasını qeyd edib”.

Açıqlamada həmçinin qeyd olunub ki, Cənubi Afrika suveren demokratik dövlət kimi qlobal platformalarda iştirakının dəyəri ilə bağlı başqa bir dövlətin təhqirlərinə dözmür və G20-də tam hüquqlu, aktiv və konstruktiv üzv kimi iştirak etməyə davam etmək niyyətindədir.

Qeyd edək ki, bundan əvvəl D.Tramp “Truth Social”da Cənubi Afrikanın 2026-cı il Florida sammitinə dəvət olunmayacağını açıqlayıb:

“Son sammitin sonunda Cənubi Afrika hakimiyyəti bağlanış mərasimində sədrliyi ABŞ səfirliyinin yüksəkvəzifəli məmuruna təhvil verməkdən imtina etdi. Buna görə də mənim göstərişimlə Cənubi Afrika Florida ştatının Mayami şəhərinin ev sahibliyi edəcəyi 2026-cı il G20 Zirvə toplantısına dəvət olunmayacaq”.

Bundan əlavə, D.Tramp bir daha Cənubi Afrikanı ağlara qarşı soyqırımda günahlandırıb.

D.Tramp 22-23 noyabr tarixlərində Cənubi Afrikada keçirilən sammiti boykot edib.