Cənubi Koreyada tarixi görüş | Tramp və Çin lideri arasında kritik müzakirə

ABŞ Prezidenti Donald Tramp Cənubi Koreyanın Pusan şəhərindəki Gimhe aviabazasında Çin Xalq Respublikasının Sədri Si Cinpinlə görüşüb.

Bu barədə "Sinxua" Xəbər Agentliyi məlumat yayıb.

ABŞ Prezidenti Donald Tramp Çin sədri Si Cinpinlə görüşünün çox uğurlu olacağına əminliyini ifadə edib.

Ağ Evin mətbuat xidməti sammitin açılış sessiyasını yayımlayıb. Amerika lideri Vaşinqton və Pekin arasında uzunmüddətli perspektivdə fantastik münasibətlərin olacağına inandığını bildirib.

"Bu gün çoxdankı dostum, Çinin hörmətli Prezidenti ilə görüşmək mənim üçün şərəfdir. Danışıqlar aparacağıq. İnanıram ki, biz artıq bir çox məsələlərdə razılığa gəlmişik və indi daha bir çox məsələdə razılığa gələcəyik. Prezident Si Cinpin böyük bir ölkənin böyük lideridir. İnanıram ki, bizim uzun müddət fantastik münasibətlərimiz olacaq", – deyə Tramp bildirib.

Si Cinpin də öz növbəsində Çin və ABŞ-nin əsas məsələlərin həllində konsensus əldə etdiyini vurğulayıb.

"İki ticarət-iqtisadi qrupumuz bizi narahat edən əsas məsələlərin həlli ilə bağlı əsas konsensusa nail olub və ümidverici irəliləyişlər əldə edib", – deyə Çin lideri cavablayıb.

O, Çin-ABŞ münasibətlərində inkişaf sürətinin saxlanmasının vacibliyini vurğulayıb.

"Fırtınalar və çağırışlarla üzləşən siz və mən sükançılar olaraq istiqaməti təyin etməli və Çin-ABŞ münasibətlərinin gəmisinin sabit hərəkətini təmin edərək ümumi vəziyyəti idarə etməliyik", – deyən Si Cinpin iki ölkə arasındakı fikir ayrılıqlarını normal adlandırıb.