Çevriliş etmək istəyənlərə Rusiyada təlim keçirilib? | Elə şeylər üzə çıxdı ki...

Sentyabrın 18-də Ermənistanda çevriliş yolu ilə hakimiyyəti ələ keçirməyə cəhd edən 3 nəfərdən birinin adı açıqlanıb.

Məlumata görə, dövlət çevrilişində əli olanlardan biri “Qara Pantera” hərbi birləşməsinin lideri Serob Qasparyandır.

Bu barədə ölkənin İstintaq Komitəsi məlumat yayıb.

Bildirilib ki, hərbi çevriliş hazırlamaq üçün bir qrup Ermənistan vətəndaşı guya Rusiyada xüsusi təlimlər də keçib.

Sözügedən “igidlər” hakimiyyət sevdasına qovuşa bilməkdən ötrü yerli sakinlərə çevrilişdə iştirak etmək üçün 220 min rubl pul da təklif ediblər.

İddialara görə, onlara hətta 3 aylıq təlimlərdə iştirak etmək üçün şərait yaradılıb.

Saxlanılan quldur dəstənin üzvləri dövlət mülklərini talama, ölkədə iğtişaşlar yaratmaq, dövlət çevrilişinə cəhd və daha bir neçə maddə ilə hakim qarşısına çıxarılacaq.

İstintaq Komitəsindən həmçinin o da bildirilib ki, təqsirləndirilən şəxslər əməllərini boyunlarına alaraq, həqiqətən də, hakimiyyəti devirmək istədiklərini etiraf ediblər. Bu niyyətlərinə çata bilmək üçün mütəmadi Rusiyanin Rostov-na-Donu şəhərinə səfər etdiklərini, orada mühacir ermənilərlə görüşüb danışdıqlarını da vurğulayıblar.

“3 nəfərlə çevriliş olar?” sualına cavab olaraq isə bildiriblər ki, sayımız çox idi, sadəcə olaraq silahlı çevrilişdən qorxub sıralarımızı tərk edənlər oldu deyə az sayda qaldıq.

Xatırladaq ki, ilkin olaraq ələ keçən 7 nəfərdən 4-ü qaçaraq gizlənib. Hüquq-mühafizə qüvvələri onların kimliyini, həm də yerlərini müəyyən etməyə çalışır.