Çexiya vətəndaşlarına çağırış etdi

“Venesuelanı tərk etməyi tövsiyə edirik”. Bu çağırışı Çexiya Xarici İşlər Nazirliyi sözügedən ölkədəki vətəndaşlarına edib.

Bu barədə ölkənin xəbər agentlikləri məlumat yayıb.

“ABŞ Federal Aviasiya Administrasiyasının xəbərdarlığından sonra əksər aviaşirkətlər regionda hərbi fəallığın artması ilə əlaqədar Karakasa və oradan aviareysləri ləğv edib. Biz bütün mümkün vasitələrdən istifadə etməklə Çexiya vətəndaşlarına mümkün qədər tez Venesuelanı tərk etməyi tövsiyə edirik”, ‒ deyə agentliklər XİN-in müvafiq sənədindən sitat gətiriblər.

Qeyd edək ki, müxtəlif ölkələrdən çoxsaylı aviaşirkətlər Venesuelaya uçuşları dayandırıb. Hazırda ölkə ilə beynəlxalq hava nəqliyyatı onun milli aviaşirkətləri və Kolumbiyanın “Wingo” aviaşirkətinin uçuşları sayəsində təmin edilir.

Media bildirib ki, ABŞ cari ilin sentyabr ayından Karib dənizi regionuna hərbi gəmilər və təyyarələr göndərib. Noyabr ayında ABŞ oradakı mövcudluğunu dünyanın ən böyük döyüş gəmisi olan “USS Gerald R. Ford”la gücləndirib.