CIA ilə ODNI arasında davam edən qarşıdurma İranla bağlı hesabatlara da təsir edir

ABŞ-nin aparıcı kəşfiyyat qurumları arasında səlahiyyət bölgüsü və məlumat mübadiləsi ilə bağlı ciddi qarşıdurma yaranıb.

Bu barədə "Reuters" agentliyi məlumat yayıb.

Məlumata görə, ABŞ Mərkəzi Kəşfiyyat İdarəsi (CIA) Milli Kəşfiyyat Direktoru Ofisinin (ODNI) hazırladığı bəzi analitik hesabatlara, o cümlədən İranla bağlı qiymətləndirmələrə töhfə verməyi dayandırıb.

Mənbələrin bildirdiyinə görə, CIA ilə ODNI arasında gərginlik bir ildən artıqdır davam edir və bu vəziyyət ABŞ rəhbərliyinin xarici siyasət qərarları üçün istifadə etdiyi kəşfiyyat təhlillərinin hazırlanmasına mənfi təsir göstərir.

Qarşıdurmanın əsas səbəbi keçmiş Milli Kəşfiyyat Direktoru Tulsi Qabbardın 2025-ci ildə yaratdığı xüsusi işçi qrupu ilə bağlı fikir ayrılıqlarıdır. CIA rəhbərliyi bu qrupun mövcud kəşfiyyat prosedurlarını pozduğunu iddia edir, ODNI isə əksinə, CIA-nı məlumatlara çıxışı məhdudlaşdırmaqda ittiham edir.

"Reuters" qeyd edir ki, bu gərginlik ABŞ-nin İranla münaqişə, Ukraynadakı müharibə və Çinin artan hərbi nüfuzu kimi mühüm təhlükəsizlik çağırışları ilə üzləşdiyi dövrə təsadüf edir.