COVID-19-un yeni variantı aşkarlandı

Ümumdünya Səhiyyə Təşkilatının baş direktoru Tedros Adhanom Qebreyesus COVID-19-un daha təhlükəli variantının ortaya çıxması ilə bağlı xəbərdarlıq edib. Bu barədə, o, təşkilatın həftəlik mətbuat konfransında açıqlama verib.

“Üç ay əvvəl mən COVID-19-un beynəlxalq əhəmiyyətli ictimai sağlamlığı təhdid edəcək halının sona çatdığını elan etdim. O vaxtdan bəri dünyada bu virusa yoluxmaların, xəstəlik səbəbindən xəstəxanaya yerləşdirilmələrin və ölümlərin sayı azalmağa davam etsə də, biz COVID-19-un yayılmağa başlayan EG.5, yəni “Eris” variantı daxil olmaqla virusun müxtəlif mutasiyalarını izləyirik. Yoluxmaların və ölümlərin sayının artmasına səbəb ola biləcək COVID-19-un daha təhlükəli variantı artıq aşkarlanıb”, – o bildirib.

Məlumat üçün bildiriək ki, "Eris" "Omicron"un alt variantıdır, ona görə də simptomları oxşardır. Söhbət boğaz və baş ağrısı, burun axması, burun tutulması, asqırma, öskürək, əzələ ağrıları, qoxu və dad itkisindən gedir.

Qeyd edək ki, Rusiyada koronavirus infeksiyasının yeni variantı artıq yayılıb. Belə ki, qonşu ölkədə aprel-avqust aylarında “Eris”ə 17 yoluxma halı aşkar edilib. Məlumata görə, koronavirusun bu variantı əvvəlki növlərdən daha sürətli yayılır.