Daha bir planetdə yaşamaq mümkün ola bilər | Alimlərdən açıqlama

Yeni araşdırmaya görə, Veneranın atmosferində həyatın formalaşması üçün əsas ola biləcək molekul – peptid nuklein turşusu mövcud ola bilər.

Bu molekulun quruluşu DNT-yə bənzəyir və o, 98 faizli kükürd turşusunda otaq temperaturunda iki həftə ərzində sabit qala bilir.

Tədqiqat Polşa, Böyük Britaniya və ABŞ-dən olan alimlər tərəfindən aparılıb. Onların fikrincə, Yer həyatının sudan asılı olduğu halda, Venerada mümkün həyat formaları güclü turşu mühitindən, yəni kükürd turşusundan asılıdır.

Polşalı alim Yanuş Yurand Pentkovskinin sözlərinə görə, qəbul olunmuş fikir budur ki, konsentrləşdirilmiş kükürd turşusu bütün orqanik maddələri məhv edir. Amma tədqiqat sübut etdi ki, bu, tam olaraq belə deyil.

Bu fikir əvvəllər Venera atmosferində fosfin və ammonyak kimi Yer üzərində bioloji aktivliklə əlaqələndirilən maddələrin aşkarlanmasından sonra irəli sürülən fərziyyələri gücləndirir. Yeni tədqiqat isə bu iddialara molekulyar əsas verir.

Bununla belə, elm adamları qeyd edirlər ki, 50°C-dən yuxarı temperaturda peptid nuklein turşusu artıq sabit deyil. Halbuki Veneranın bulud qatlarında temperatur 0-dan 100°C-yə qədər dəyişir.

Alimlərin növbəti məqsədi bu temperatur aralığında sabit qalan və "qeyri-yer həyatının DNT-si" rolunu oynaya biləcək bir polimer yaratmaqdır.