“Danışıqlar çox vacibdir” | Pekindən Vaşinqtona mesaj

ABŞ Prezidenti Donald Tramp İranda qızlar üçün ibtidai məktəbə edilən hücuma görə Tehranın məsuliyyət daşıdığını iddia edib.

“Gördüklərimə əsasən hesab edirəm ki, bunu İran edib” deyən Ağ Ev rəhbəri ABŞ-İsrail əməliyyatı fonunda Rusiyanın İrana mümkün yardımına da münasibət bildirib.

Ondan Moskvanın İranı hər hansı bir şəkildə dəstəkləməsi barədə bir şey bilib-bilmədiyi soruşulub və Tramp cavabında bunu düşünmək üçün heç bir səbəbi olmadığını deyib.

Amerika lideri Britaniyanın hərbi əməliyyata dəstək məqsədilə təyyarədaşıyan gəmilərini gec göndərməsi məsələsinə də toxunub.

“Bir vaxtlar böyük müttəfiqimiz, bəlkə də, ən böyük müttəfiqimiz olan Britaniya, nəhayət ki, Yaxın Şərqə iki təyyarədaşıyan gəmi göndərməyi ciddi şəkildə nəzərdən keçirir. Baş nazir Starmer, artıq onlara ehtiyacımız yoxdur, amma bunu xatırlayacağıq. Artıq qalib gəldikdən sonra müharibələrə qoşulan insanlara ehtiyacımız yoxdur”, – deyə o, “Truth” sosial şəbəkəsində yazıb.

“Donald Tramp Pekinin əsas tərəfdaşlarını hədəf aldığı üçün ABŞ və Çin Xalq Respublikası arasında dialoq qlobal ziyana səbəb ola biləcək səhv hesablamaların qarşısını almaq üçün çox vacibdir”.

Belə bir açıqlama ilə Çinin xarici işlər naziri Vanq İ çıxış edib. O qeyd edib ki, iki ölkə arasında əməkdaşlığın olmaması yalnız anlaşılmazlıqlara və səhv mühakimələrə səbəb olacaq ki, bu da qarşıdurmanı gücləndirəcək və bütün dünyaya zərər verəcək.