Dələduzlar biznesmenlərdən görün nə tələb etdi | İtaliyada aləm qarışdı

İtaliyada telefon dələduzları süni intellektdən istifadə edərək ölkənin müdafiə naziri Quido Krozettinin səsini imitasiya ediblər.

Onlar böyük biznesmenlərə və iri korporasiya rəhbərlərinə zəng edərək milyonlarla avro dəyərində vəsaiti ələ keçirməyə çalışıblar.

Dələduzlar zəng zamanı iş adamlarından Yaxın Şərqdə qaçırılmış italyan jurnalistlərin azad edilməsi üçün guya fidyə ödənişi məqsədilə Honkonqdakı bir bank hesabına bir milyon avro köçürməyi tələb ediblər.

Fırıldaqçıların qurbanları arasında "Prada"nın prezidenti Patrizio Bertelli, məşhur modelyer Corcio Armani, "Pirelli & C. SpA"nın top-meneceri Marko Provera və "İnter" futbol klubunun keçmiş sahibi Massimo Moratti də var.

Milan Prokurorluğu artıq məsələ ilə bağlı araşdırmalara başlayıb. Hadisəni “absurd” adlandıran müdafiə naziri Q.Krozetti “X” sosial şəbəkəsində paylaşım edərək bildirib ki, bir biznesmen zəng edərək ona öz adından və bir generalın adından fırıldaqçılıq edildiyini deyib.