Delsi Rodriqes Venesuelanın müvəqqəti prezidenti kimi and içdi

Venesuelanın vitse-prezidenti vəzifəsini tutan Delsi Rodriqes Karakasda ölkənin Milli Assambleyasındamüvəqqəti dövlət başçısı kimi and içib.

Parlament andiçməni canlı yayımlayıb. Andiçmə mərasimini parlamentin spikeri və müvəqqəti prezidentin qardaşı Xorxe Rodriqes keçirib.

"Mən Venesuela Bolivar Respublikasının konstitusiya ilə Prezidenti Nikolas Maduro Morosun icraçı vitse-prezidenti kimi and içirəm. Bunu vətənimizə qarşı qanunsuz hərbi təcavüz nəticəsində Venesuela xalqına vurulan əzab-əziyyət səbəbindən böyük ağrı hissi ilə edirəm", – deyə Rodriqes mərasimdə bildirib.

O, Maduronu və onun həyat yoldaşı Siliya Floresi ABŞ-də girov saxlanılan qəhrəmanlar adlandırıb.

"Şərəfimlə and içirəm ki, Venesuelanın azad, suveren və müstəqil bir millət kimi öz arzusuna çatdığını görənə qədər dayanmayacam", – deyə o bildirib.

Qeyd edək ki, daha əvvəl Venesuela Ali Məhkəməsi vitse-prezident Delsi Rodriqesi müvəqqəti dövlət başçısı təyin edib. Bu qərar Ali Məhkəmənin Konstitusiya Palatası tərəfindən yanvarın 3-də baş verən xarici hərbi təcavüz və Venesuelanın konstitusiyalı Prezidenti Nikolas Maduronun oğurlanması ilə əlaqədar qəbul edilib.