Donald Trampdan Amerika kanalları ilə bağlı sərt qərar | Sensasiyalı xəbərin detalları

ABŞ Prezidenti Donald Tramp Amerikanın ABC və NBC telekanallarının yayım lisenziyalarının ləğvini dəstəkləyəcəyini bildirib.

O, bunu “Truth Social” hesabında açıqlayıb.

Bu qərarını isə Tramp telekanalların onu tənqid etməsi, Demokratlar Partiyasının maraqlarını təbliğ etməsi ilə əsaslandırır:

“Çox populyar olmasına və bir çoxlarının prezidentlik tarixinin ən yaxşı 8 ayı hesab etdiyinə baxmayaraq, ən pis və ən qərəzli televiziya şəbəkələrindən ikisi olan ABC və NBC kimi yalançı media zamanının 97 faizində mənim haqqımda mənfi xəbərlər nümayiş etdirir. Əgər belədirsə, o zaman onlar sadəcə olaraq Demokratik Partiyanın bir qoludur və çoxlarının hesab etdiyi kimi, FCC onların lisenziyalarını ləğv etməlidir. Mən bunu tam dəstəkləyərdim, çünki onlar o qədər qərəzlidirlər və yalan danışırlar ki, demokratiyamız üçün real təhlükə yaradırlar”.

Tramp həmçinin telekanalların hava tezliklərindən istifadəyə görə milyonlarla dollarlıq lisenziya rüsumlarını köçürmədiyini qeyd edərək, ABC və NBC-nin bu pulu ödəməli olduğu fikrini bildirib.