Dörd milyard il əvvəl baş vermiş toqquşmanın nəticələri

Vaxtilə “kainatın ən sakiti” hesab olunan qalaktika toplusunun əslində nəhəng kosmik toqquşma nəticəsində formalaşdığı məlum olub.

Astronomlar uzun illər ərzində “Abell 2029” qalaktika qrupunu kainatın ən sakit sistemlərindən biri hesab etsələr də, yeni araşdırma onun daxilində milyardlarla il əvvəl baş vermiş güclü toqquşmanın izlərinin hələ də qaldığını üzə çıxarıb.

ABŞ-də yerləşən Çandra Rentgen Rəsədxanasının müşahidələri göstərib ki, qalaktika sisteminin daxilindəki qaz hələ də hərəkətdədir, dalğalanır.

Elm adamlarının fikrincə, bu hadisə təxminən 4 milyard il əvvəl daha kiçik qalaktika qrupunun “Abell 2029” ilə toqquşması nəticəsində baş verib.

Araşdırma zamanı nəhəng spiralvari strukturlar, zərbə dalğaları və həddindən artıq isti qaz axınları aşkar edilib.

Alimlər həmçinin uzunluğu təxminən 2 milyon işıq ili olan nəhəng spiral quruluş qeydə alıblar, bu da indiyə qədər aşkar olunmuş ən böyük belə strukturlardan biri hesab edilir.

Alimlərin qənaətinə görə, yeni kəşf qalaktika topasındakı qazların niyə milyardlarla il ərzində yüksək temperaturunu qoruyub saxladığını izah edə bilər.