Dünyanın gündəmindən düşməyən liderin ad günüdür

Bu gün – yanvarın 25-i Ukrayna Prezidenti Volodimir Zelenskinin doğum günüdür.

O, 1978-ci ilin bu günündə Dnepropetrovsk vilayətinin Krivoy Roq şəhərində anadan olub. Zelenski 4 il anası ilə birlikdə Monqolustanın Erdenet şəhərində yaşayıb, daha sonra vətəninə geri dönüb. Volodimir prezidentliyə qədər şoumen, aktyor, rejissor, ssenarist, prodüser və bədii direktor kimi fəaliyyət göstərib. 2003-cü ildə isə məktəb dostu olan Yelena Kiyaşko ilə ailə həyatı qurub. Cütlüyün 2 övladı – Aleksandra adlı qızı və Kiril adlı oğlu var.

Əvvəllər incəsənət sahəsində çalışan Zelenski "Xalqın xidmətçisi" teleserialı ilə məşhurlaşıb. O, 2018-ci ildə eyniadlı partiyanın qurucularından biri və lideri olub.

Volodimir Zelenski 2019-cu ildə Ukraynanın prezidenti seçilib. Rusiyanın Ukraynaya qarşı ötən ilin fevralın 24-dən başlatdığı müharibədən sonra Zelenski dünyanın ən çox danışılan liderlərindən birinə çevrilib.