Efiopiyada silahlı qarşıdurma şiddətləndi | Ağır silahlar döyüşə cəlb edildi - Baku TV

Efiopiya Ordusu ilə regional qüvvələr arasında silahlı qarşıdurma yaşanıb.

Döyüşlər zamanı ağır artilleriyadan və pilotsuz uçuş aparatlarından istifadə olunub.

Həlak olanların sayı hələlik məlum deyil. Şiddətli döyüşlər səbəbindən yüzlərlə dinc sakinin və yaralanan silahlıların sərhədi keçərək qonşu Sudana sığındığı bildirilir.

Federal hökumət və federal ordu hələlik rəsmi bəyanatla çıxış etməsə də, nazir Abraham Belay toqquşmaların baş verdiyini təsdiqləyib.

O, sosial şəbəkədə paylaşdığı açıqlamada döyüşlərin başlanmasına görə Tiqray Xalq Azadlıq Cəbhəsini günahlandırıb və münaqişə davam edəcəyi təqdirdə bunun “daha ağır nəticələrə” səbəb olacağı barədə xəbərdarlıq edib.

Döyüşlərin Sudan vətəndaş müharibəsi çərçivəsində proksi münaqişəyə çevrilə biləcəyi ehtimalı olunur. Belə ki, Sudanda qarşıdurmada iştirak edən tərəflərin Efiopiyada müxalif düşərgələri dəstəklədikləri barədə ittihamlar səsləndirilir.

Qeyd edək ki, Efiopiyanın şimalında Tiqray Xalq Azadlıq Cəbhəsi ilə federal hökumət arasında iki il davam edən və yüz minlərlə insanın həyatına son qoyan vətəndaş müharibəsi 2022-ci ildə Afrika İttifaqının vasitəçiliyi ilə imzalanmış sülh sazişi ilə başa çatıb.