Elm dünyasında inqilab yaradan kəşf | Su altında qalan sirlər üzə çıxır

İndoneziyanın dərin sularında aparılan qeyri-adi kəşf yalnız insanlığın təkamülünə deyil, həm də tarixdən öncəki coğrafiyaya dair qəbul olunmuş fikirləri alt-üst edib.

Madura boğazının dibindən çıxarılan 140 min illik qalıqlar elmi dünyada demək olar inqilab yaradıb.

Şərqi Yava əyalətinin paytaxtı Surabaya yaxınlığında işçilər dəniz dibindən çöküntü qazarkən 6000-dən çox daşlaşmış qalıq aşkar ediblər. Onların arasında iki insan kəllə sümüyü parçası da var. Bunların müasir insanın erkən əcdadı olan Homo Erektusa aid olduğu müəyyən edilib.

Tədqiqatçılar bu fosillərin yerləşdiyi çöküntü qatlarını da ətraflı təhlil ediblər. Müəyyən olunub ki, bu fosillər orta pleystosen dövrünə aiddir. Bu dövr buzlaqların tədricən əriyərək dəniz səviyyəsinin qalxmağa başladığı və sahil ovalıqlarının su altında qaldığı kritik mərhələdir.

Elm adamları həmçinin qədim Solo çayından qalan basdırılmış vadi sisteminə də rast gəliblər. Bu sistem həmin ərazidə su altında qalmadan əvvəl geniş çay ekosistemlərinin mövcud olduğunu göstərir.

Madura boğazındakı bu kəşf əslində daha böyük mənzərənin yalnız bir parçasıdır. Alimlər texnologiyanın inkişafı ilə birlikdə su altında qalmış şəhərlərin, icmaların və insan fəaliyyətlərinin izlərini daha dəqiq üzə çıxarmağı ümid edirlər.

Maraqlısı odur ki, əgər Surabayadakı ada layihəsi daha sürətli irəliləsəydi, bu fosillər çox güman ki, əbədi olaraq yox olacaqdı.