Ərdoğan Hatayda mənzillərin təhvil verilməsi mərasimində çıxış etdi

Türkiyənin Hatay vilayətində 2023-cü ilin fevral ayında baş verən zəlzələ nəticəsində evlərini itirən ailələrə yeni mənzillər təqdim olunub.

Evlərin təqdimat mərasimində Prezident Rəcəb Tayyib Ərdoğan da iştirak edib.

R.T.Ərdoğan zəlzələdə Türkiyəyə yardım edən ölkələrə təşəkkür edib:

“Başda 11 min 500 əcnəbi qrup üzvü olmaqla 35 min 250 axtarış-xilasetmə heyətimizə, 142 min mühafizəçimizə, səhiyyə işçimizə, mədənçilərimizə, meşə işçilərimizə, könüllülərimizə öz adımdan və millətim adından təşəkkür edirik”.

Bu arada Türkiyədə 6 fevral zəlzələləri ilə bağlı 3 minə yaxın şəxs barəsində cinayət işi açılıb.

Yeraltı təkanların baş verdiyi bölgədə dağılan və ya tikinti normalarına zidd olaraq dəyişdirilən binalarla bağlı aparılan araşdırmalarda 2825 şübhəli haqqında cinayət işi başlanılıb.

Bu barədə Türkiyənin ədliyyə naziri Yılmaz Tunç sosial şəbəkədəki səhifəsində yazıb.

Onun sözlərinə görə, həmin şəxslərdən 267-si barəsində həbs qətimkan tədbiri seçilib. 984-nün barəsində isə məhkəmə nəzarəti qərarı çıxarılıb.