Ermənilərin etiraz aksiyası amerikalıları qəzəbləndirdi

ABŞ-də Los-Anceles ətrafı ərazilərdə ermənilərin etiraz aksiyalarının yolun bağlanmasına gətirib çıxarması digər sakinlərin narazılığına və qınağına səbəb olub, bu narazılıq bəzən kobud formada özünü büruzə verib.

Etirazçılar Qlendeyldə magistral yolu bağlayıb və nəticədə bütün istiqamətlərdə hərəkət dayanıb. Bundan narazı olan yerli sakinlər sosial şəbəkələrdə qəzəbli şərhlər yazıblar.

“Bunun baş verməsinin səbəblərini anlamıram. Amma mən belə bir tıxacda qalsaydım, etirazınızla əldə etmək istədiyiniz nəticənin əksini əldə etmək üçün petisiyaya şəxsən imza atardım. Əslində, mən bu tıxacda qalsaydım, sizin acığınıza Azərbaycan Ordusuna ianə bağışlayardım”, – deyə sosial şəbəkəsinin istifadəçilərindən biri yazıb.

Bundan başqa, ermənilərin konqresmen Adam Şiffin diqqətini cəlb etmək istəyi sosial şəbəkə istifadəçilərini özündən çıxarıb: “Sadəcə bu hekayəni oxuyun. Amerikalı konqresmen niyə Ermənistandakı ermənilər üçün nəsə etməlidir? Mən konqresmenimdən məni və maraqlarımı təmsil edəcəyini gözləyirəm”.

“Onlar bu mənasız etirazla hər kəsi qəzəbləndirərək, onsuz da başqa ölkədəki problemi həll edə bilməyəcək siyasətçinin dəstəyini almağa çalışırlar”, – deyə digər bir istifadəçi yazıb.

Qeyd edək ki, bu, ermənilərin yaşadıqları ölkəyə münasibətdə nankorluqları ilə bağlı narazılıqların yalnız kiçik bir hissəsidir. Amerikalılar onların ölkəsində yaşayan və əhalinin rahatlığını pozan ermənilərin eqoist davranışlarından beziblər.