Ermənistan yüksək vəzifəliləri qapalı iclasda bir araya gəldi

Ermənistan parlamentinin müdafiə və təhlükəsizlik məsələləri üzrə komissiyasında qapalı iclas keçirilib.

Yerli medianın yaydığı məlumata görə, iclasda ölkənin güc strukturlarının rəhbərləri də iştirak ediblər.

Görüşə Ermənistanın müdafiə naziri Suren Papikyan, Silahlı Qüvvələrin Baş Qərargah rəisi Edvard Asryan, Milli Təhlükəsizlik Xidmətinin direktoru Armen Abazyan və daxili işlər naziri Vahe Qazaryan qatılıb.

İclas açıq elan edilsə də, Suren Papikyan məlumatların tam məxfi olduğunu əsas gətirərək toplantının qapalı keçirilməsini istəyib.

Bundan sonra parlamentin müdafiə və təhlükəsizlik məsələləri komitəsinin sədri Andranik Koçaryan media nümayəndələrindən zalı tərk etmələrini xahiş edib. Eyni zamanda müdafiə nazirinin çıxışından əvvəl deputatların və təhlükəsizlik qüvvələrinin nümayəndələrinin telefonları dinlənilmənin qarşısının alınması adı ilə yığılaraq xüsusi seyfdə saxlanılıb.

Qeyd edək ki, qapalı iclas başlamazdan əvvəl nazir qısa giriş nitqi ilə çıxış edib. O, çıxışı zamanı 2023-cü ildə Müdafiə Nazirliyinin beş proqramı üzrə dövlət büdcəsindən 526,47 milyard dram, yəni təxminən 1,3 milyard ABŞ dolları ayrıldığını vurğulayıb.