ABŞ və İran arasındakı gərginliyə Ermənistan necə reaksiya verdi? - BİZDƏN NƏ DANIŞIRLAR?

“Bizdən nə danışırlar?” verilişinin yeni buraxılışı yayımlanıb.

Verilişdə bildirilib ki, Türkiyə Böyük Millət Məclisinin sədri Numan Kurtulmuş Ermənistanı Türkiyə–Gürcüstan–Azərbaycan üçtərəfli formatına daxil etməyi təklif edib.

“Armenpress” xəbər verir ki, bu barədə Ermənistan parlamentinin sədri Alen Simonyan Numan Kurtulmuşla görüşündən sonra bildirib.

“Mən İstanbulda Parlamentlərarası İttifaqın 152-ci Assambleyası çərçivəsində Türkiyə Böyük Millət Məclisinin sədri Numan Kurtulmuşla söhbət etdim. Həmkarımın Gürcüstan parlamentinin sədri ilə görüşü zamanı səsləndirdiyi regionumuzda sülh, sabitlik və rifahın təşviqinə doğru bir addım olaraq Ermənistanın Türkiyə–Gürcüstan–Azərbaycan formatına daxil edilməsi barədə son təklifini alqışladım”, – deyə A.Simonyan qeyd edib.

Aprelin 12-də Azərbaycanın İran İslam Respublikasındakı səfirliyi öz fəaliyyətini bərpa edib.

“Kavkazskiy Uzel” nəşri ölkəmizin Xarici İşlər Nazirliyinə istinadən xəbəri oxucularının diqqətinə çatdırıb.

Bildirilib ki, səfirlik ilkin mərhələdə səfir daxil olmaqla məhdud sayda diplomatik və inzibati heyət ilə fəaliyyət göstərəcək.