Fars körfəzi akvatoriyasında gözlənilməz zərbə | Yüzlərlə ABŞ hərbçisi... - Baku TV

İrana qarşı hərbi əməliyyat başlayandan bəri ABŞ Ordusunda çoxsaylı yaralanma halları qeydə alınıb.

Bu barədə “ABC News” telekanalı Pentaqona istinadən məlumat yayıb.

Məlumata görə, əməliyyatın başlanğıcından 348 ABŞ hərbçisi yaralanıb. Onlardan 315-i artıq xidmətə qayıdıb, azı 10 nəfərin vəziyyəti isə ağır olaraq qalır.

Statistikaya əsasən, gündə orta hesabla 11 amerikalı hərbçi xəsarət alır. Rəsmi məlumatlara görə, döyüşlər zamanı ABŞ-nin 13 hərbi qulluqçusu həlak olub.

Bu arada Qətər sahilləri yaxınlığında, Fars körfəzi akvatoriyasında tanker naməlum mərmi ilə vurulub.

Böyük Britaniyanın Dəniz Ticarət Əməliyyatları Mərkəzinin "X" sosial şəbəkəsində yaydığı məlumata görə, Qətərin paytaxtı Dohadan 17 dəniz mili şimalda baş vermiş insident barədə məlumat daxil olub. Tanker sol bortundan naməlum mərmi ilə vurulub ki, bu da gəminin gövdəsinin zədələnməsinə səbəb olub.

Vurğulanıb ki, gəminin heyət üzvləri xəsarət almayıblar və təhlükəsizlikdədirlər. Baş vermiş insident nəticəsində ekoloji zərər qeydə alınmayıb.