Fələstinlilərdən İsrailin təxliyə xəbərdarlığına etiraz

“Biz ölənə qədər Qəzzada qalacağıq. Tarixdə qalacaq ki, Qəzzanın oğulları doğma yurdlarını tərk etmədilər”.

Bu sözləri Qəzzada keçirilən etiraz aksiyasında Azhar Universitetinin müəllimi Yəhya əl-Mədhun deyib.

Digər fələstinli Kərəm Carada bildirib ki, yeganə istəyimiz ləyaqətlə yaşamaqdır.

“Onsuz da təxliyə olunacağımız Qəzzanın cənubu da təhlükəsiz deyil. Bu səbəbdən Qəzzada qalacağıq”, ‒ deyə o qeyd edib.

Qeyd edək ki, İsrail Ordusu Qəzza şəhərinin sakinlərinə təxliyə vərəqələri paylayıb, çünki HƏMAS-a qarşı böyük əməliyyat gözlənilir. Lakin bu xəbərdarlığa baxmayaraq, fələstinlilər şəhərdən çıxmayacaqlarını elan ediblər.

HƏMAS isə İsrailin Baş naziri Benyamin Netanyahunu Qəzza şəhərində onlarla yaşayış evinin dağıdılmasına görə qınayıb.

Fələstinlilərin hərəkatı İsrail Ordusunun hücumlarını qəddar hərbi cinayət adlandırıb. Səbəb Qəzzanın 12 mərtəbəli binasının bombalanmasıdır. Binada onlarla məcburi köçkün ailənin məskunlaşdığı bildirilir. İsrail isə belə binalarda HƏMAS yaraqlılarının gizləndiyini düşünür.

Qeyd edək ki, İsrail və HƏMAS ABŞ Prezidenti Donald Trampın yeni atəşkəs təklifini qəbul etdiklərini açıqlayıb. Sentyabrın 8-də Qüds şəhərində baş verən terror aktından sonra isə İsrail HƏMAS-a qarşı hücumları daha da gücləndirib.