Fransada etirazçılar onlarla jurnalistə hücum etdi

Fransada baş verən etirazlar zamanı onlarla jurnalist fiziki və mənəvi təzyiqlərə məruz qalıb. Sərhədsiz reportyorlar baş verən hadisələri qınayıblar. Bu barədə Emma Odri adlı jurnalist “Twitter” səhifəsində paylaşım edib.

Məlumata görə, iyunun 29-dan 30-na keçən gecə etirazları işıqlandıran “Le Figaro” qəzetinin 2 əməkdaşı etirazçıların hücumu ilə üzləşib. Onlardan biri etirazların mərkəzi hesab edilən Nanter şəhərindəki Pablo Pikassonun malikanəsi yaxınlığında döyülüb və qarət edilib. 2-ci jurnalist isə Parisdə şahidi olduğu zorakılığın fotosunu çəkməyə çalışarkən eyni aqibətlə üzləşib.

Bundan başqa, Nanterdə məşhur fotoqraf Korentin Folen də zorakılıqla üzləşib. Onun sözlərinə görə, şəkil çəkərkən aksiya iştirakçılarından biri ona daşla hücum edib. “Təəccüblü səslənsə də, həyatımı itirməkdən çox, şəkillərimi itirməkdən qorxdum”, – deyə Korentin Folen bildirib.

Qeyd edək ki, Qətərin “Əl-Cəzirə” telekanalının əməkdaşları da aksiyalar zamanı hücuma məruz qalıb. Jurnalistlər etirazçı gənclər tərəfindən döyülüb, operatorun çəkiliş avadanlıqları isə oğurlanıb.