Gərginlik artdı, Rusiya sərhəddə hərəkətə keçdi | Yeni müharibə burada başlayır?

Rusiya Finlandiya ilə sərhəddə hərbi mövqelərini gücləndirir. Bu isə Ukrayna müharibəsi fonunda arktik gərginliyi artırır.

“The New York Times”ın yazdığına görə, yeni peyk görüntüləri sadalanan məlumatı təsdiqləyir.

Sərhəddə yeni çadırlar qurulur, qırıcı təyyarələr üçün sığınacaqlar və silah-sursat anbarları hazırlanır. Bütün bunlar Kremlin Finlandiyaya müdaxiləsi ilə bağlı uzunmüddətli strategiyasının bir hissəsidir. Bu həm də NATO-ya qarşı savaşa hazırlıq kimi yozulur.

NATO da məlumatı təsdiqləyib ki, Ukrayna ilə savaş dayandırılan kimi Rusiyanın Alyansla gərginliyi yarana bilər.

Finlandiya müdafiə kəşfiyyatının generalı Pekka Turunen də bu barədə narahatlığını ifadə edib.

O bildirib ki, Finlandiya ilə sərhədə yaxın ərazilərdə hərbi bazaların tikintisi aktiv fazada aparılır. Oxşar fəallıq Estoniya ilə sərhəddə də müşahidə olunur.

Analitiklər bunu Arktikanın Rusiya üçün əhəmiyyəti ilə izah edirlər. Çünki Arktika Rusiya üçün böyük dövlət anlayışının qayələrindən biridir.