Göldən müəmmalı görüntülər | Gündəmi alt-üst edən xəbərin detalları

Şotlandiyada yerləşən Lox Ness gölü ilə bağlı əfsanə bitmək bilmir.

Daha dəqiq, əfsanəvi canavar hekayəsi yenidən gündəmə gəlib. Gölün cənubundakı Şoreland Lakses yaxınlığında yerləşdirilən veb-kamera tərəfindən qeydə alınan yeni görüntülər böyük marağa səbəb olub. Videoda suyun səthində görünən iki ayrı ağ su dalğası göldə bir yox, iki fərqli canlı ola biləcəyi ehtimalını gündəmə gətirib.

Lox Ness canavarı üzrə ixtisaslaşmış bəzi ekspertlər görüntülərin uzaqdan çəkildiyini nəzərə alaraq, canavarlardan birinin təxminən 3-3,5 metr, digərinin isə 5-5,5 metr uzunluğunda olduğunu bildirirlər.

Bu yeni iddialar Böyük Britaniya, İrlandiya və Şotlandiya mətbuatında geniş əks-səda doğurub. Xüsusilə də yay mövsümünün yaxınlaşması ilə Lox Ness ətrafında hotellərə tələbatın artacağı gözlənilir.

Britaniyalılar üçün Lox Nessdə canavar axtarmaq demək olar ki, bir milli ənənəyə çevrilib. İndi bu axtarış yalnız bir canavara deyil, bəlkə də iki sirli varlığa yönələcək.