“Görün nə günə qoymuşuq” | Qərbi və Şərqi Azərbaycan vilayətlərinin təbiəti məhv edilir?

“Urmiya bir vaxtlar İranın Parisi idi, indi isə nəyə oxşadığı da məlum deyil”.

Bu sözləri İran İslam Respublikasının Prezidenti Məsud Pezeşkian Urmiya gölü quruduqdan sonra bölgədəki vəziyyəti şərh edərkən bildirib.

O, Qərbi Azərbaycanın mərkəzi olan Urmiya şəhərində çıxışı zamanı gölün çirklənməsi, ətraf mühitin, təbiətin məhv edilməsini sərt şəkildə tənqid edib.

"Urmiya bir vaxtlar İranın Parisi idi, indi görün biz onu nə günə qoymuşuq. Bu məni çox narahat edir", – deyə M.Pezeşkian bildirib.

Onun çıxışı zamanı auditoriyadan "Əfqanıstana oxşayır" sözləri səslənib. Prezident də bununla razılaşıb: “Bəli, Əfqanıstana çevrilib".

Prezident həmçinin Məhabadda aparılan işlərin vəziyyətindən də narazılıq edib və idarəetmədə ciddi dəyişikliklərin vacibliyini vurğulayıb.

Urmiya gölünün quruması Qərbi və Şərqi Azərbaycan vilayətlərinin təbiətini, ekologiyasını məhv edib. Mütəxəssislər bu təbii fəlakət səbəbindən regionda xəstəliklərin yaranacağını, quraqlığın olacağını proqnozlaşdırırlar.